【2024 20IMPACT20 堅毅青年日記 - Leg 2 Day 7】辛苦的一天

2024 Dec 7

Written by: Francesca (Leg 2)

Translated by: Billy (Leg 1)

充滿挑戰的一天🥲今日朝早我轉到Charlie嘅團隊，天氣正常，但係風勢強勁。我哋啱啱經過咗基隆市，雨一直都冇停過，「雨都」基隆果然名不虛傳。

船長Amelia 喺出發去台灣之前都預告咗俾我哋知，旅程途中有機會遇到50 knots 嘅陣風。50 knots強度嘅風絕對唔係講笑，容許飛機降落嘅風速上限都只係35 knots，所以未免我哋都有啲擔心。

去到夜晚，風逐漸增強，海水同雨水不停地灑向坐喺駕駛艙嘅我哋。最緊張刺激嘅係，大風大雨，大浪底下，我必須要用盡九牛二虎之力去穩定船舵。由於大風嘅關係，船身傾側得好厲害。但強風底下，Spirit可以一直以高速13 knots行駛。經歷過呢一切嘅我，已經無所謂懼。

半夜嘅時候情況更加大挑戰，我哋需要喺大浪大雨同埋摸黑嘅情況下，做一個順風轉向。起初我係有啲驚，但呢個正正係我選擇航海嘅原因。我自告奮勇同Charlie一齊去船頭鬆開主帆。喺大風大浪嘅情況下，要行去船頭真係舉步維艱，啲浪不停咁打喺我哋身上。去到船頭我坐咗喺船嘅桅桿下面，用我最大嘅努力解開帆繩。突然船長Amelia大叫一聲，「Hold tight!」，我用盡全力捉住桅桿。幸好我冇跣低，亦都成功完成轉向。

之後我地慢慢行返去駕駛艙，全身濕透，身體不停咁震🥶。呢一次嘅經歷比到一個深刻嘅反思我自己，以往嘅自己都係比較被動。但今次嘅航行挑戰改變咗我自己，我覺得已經無所畏懼。作為中醫師嘅我，再大嘅風浪我都有能力衝破，我更加有能力戰勝所有疾病。今次嘅經驗大大咁提高咗我嘅自信，而將來嘅我一定會帶住呢份自信去治療病人。

呢一趟喺Spirit上充滿挑戰同辛苦嘅旅程，提醒左我喺日常生活入面，應該時刻帶着呢個無懼嘅Spirit。勇敢接受所有挑戰，經歷一切，克服一切。